第一次接觸攀石應該係兩年幾前。
一攀就攀上癮，我上年仲考埋個健身教練牌，喺間紐約一間攀石場教基本抱石技巧。
我玩開抱石，即係Bouldering，唔會用rope同harness，保護你嘅只有地上的厚墊。而雖然有墊，但如果你跳落嚟嗰時跳得唔好，都係有機會受傷。扭親手腳係平常事，我試過爭少少斷手，打咗成個月石膏！
雖然受過傷，有少少心理陰影，但都無阻我對攀石嘅熱誠！因為我隻手比較細，我最愛嘅style係crimping，即係啲holds通常都會好細，你要用手指同頭尖嘅力量去拉起同撐起你全身的重量，好似呢條片咁。次次都爬到我心驚膽戰，一唔小心就會打直跌落嚟，毁容都似呀，但係...但係真係好好玩㗎！😻
而家因為疫情關係，紐約的運動場所仲未可以開，我已經一段時間冇攀過石喇，手上啲枕都冇得七七八八。而我個人覺得攀石最最最緊要就係要勤力，到我再攀得返石之日，我就等於好似要從頭學起咁。
不過，只要我仲有氣有力，我都會繼續攀落去，從頭嚟過又點話。💪🏻
Instagram: www.instagram.com/jessess
Search